T’accumpagno vico vico

sulo a tte ca si’ ‘n amico

e te porto pe’ ‘e quartiere

addo’ ‘o sole nun se vede,

ma se vede tutto ‘o riesto

e s’arapeno ‘e ffeneste

e capisce comm’ è bella

‘a città ‘e Pulecenella.

Comm’ è bella, comm’è bella

‘a città ‘e Pulecenella. (2v.)

Me dispiace sulamente

ca l’orgoglio ‘e chesta gente

se murtifica ogni juorno

pe’ ‘na manica ‘e fetiente,

che nun teneno cuscienza

e nun teneno rispetto,

comme fanno a piglia’ suonno

quann’ è ‘a sera dint’ ‘o lietto.

Dint’ ‘o lietto dint’ ‘o lietto

quann’ è ‘a sera dint’ ‘o lietto. (2v.)

Po’ te porto a Margellina

sempe ca nun tiene fretta

verso ‘e ccinche d’ ‘a matina

quann’ ‘o traffico ‘o ppermette.

Cca’ è permesso tuttecose

no pecché tieno ‘o diritto,

ma pecché s’e’ sempe fatto

o è sultanto pe’ dispietto.

Pe’ dispietto pe’ dispietto

e’ sultanto pe’ dispietto. (2v.)

Me dispiace sulamente

ca l’orgoglio ‘e chesta gente

se murtifica ogni juorno

e nuje ce mettimmo scuorno;

e nisciuno po’ ffa’ niente

ce zucammo ‘a caramella,

comm’ è ddoce e comm’ è bella

‘a citta’ ‘e Pulecenella.

Comm’ è ddoce e comm’ è bella

‘a citta’ ‘e Pulecenella. (2v.)

Io che songo musicante

e me sento furtunato

canto e ssono sono e canto

chesta bella serenata

pecché so’ ‘nnammurato

pecché forse ce so’ nato

ma vedite comm’ è bella

‘a citta’ ‘e Pulecenella.

Comm’ è bella comm’ è bella

‘a citta’ ‘e Pulecenella. (2v.)