N’albero piccerillo aggiu piantato,

criscènnolo cu pena e cu sudore.

Na ventecata già mme ll’ha spezzato

e tutt’e ffronne càgnano culore.

Cadute so’ già ‘e frutte: e tuttuquante,

erano doce, e se so’ fatte amare.

Ma ‘o core dice: «Oje giuvinotto amante,

‘e ccose amare, tiénele cchiù care».

E amara comme si’, te voglio bene,

te voglio bene e tu mme faje murì.

Era comm’o canario ‘nnammurato,

stu core che cantaje matina e sera.

«Scétate!», io dico, e nun vo’ sta’ scetato.

e mo, nun canta manco a primmavera!

Chi voglio bene nun mme fa felice:

forse sta ‘ncielo destinato e scritto.

Ma i’ penzo ca nu ditto antico dice:

«Nun se cummanna a ‘o core». E i’ mme sto zitto!

E mme sto zitto, sì, te voglio bene,

te voglio bene e tu mme faje murì.

Chiagno p’ammore, e cade ‘o chianto mio

dint’a ‘sta testa: ‘o chianto ‘a sta arracquanno.

Schiòppa na bella rosa e i’, pe’ gulio,

a chi mm’ha fatto chiagnere nce ‘a manno.

Lle dico: «Rosa mia, tu mme perduone

si te scarpesarrà senza cuscienza».

Ce sta nu ditto ca mme dà ragione:

«Fa’ bene e scorda e si faje male penza».

Pènzace buono sì, te voglio bene,

te voglio bene e tu mme faje murì.