Era de maggio e te cadeano ‘nzino

a schiocche a schiocche li ccerase rosse;

fresca era ll’aria e tutto lu ciardino

addurava de rose a ciente passe.

Era de maggio io no, nun me scordo

‘na canzone cantavemo a ddoje voce,

cchiù tempo passa e cchiù me n’allicuordo.

Fresca era ll’aria e la canzone dolce.

E diceva: «Core, core!

Core mio, luntane vaje

tu me lasse e io conto ll’ore

chi sa quanno turnarraje!».

Rispunnev’io: «Turnarraggio

quanno tornano li rrose

si stu sciore torna a maggio

pur’ a maggio io stonco cca’

Si stu sciore torna a maggio

pur’ a maggio io stonco cca’».

E so’ turnato e mò comm’a ‘na vota

cantammo ‘nzieme lu mutivo antico;

passa lu tiempo e lu munno s’avota

ma l’ammore vero no, nun vota vico.

De te, bellezza mia, m’annamuraje

si t’allicuorde ‘nnaze a la funtana

l’acqua là dinto nun se secca maje,

e ferita d’ammore nun se sana!

Nun se sana, ca sanata

si se fosse, gioia mia,

mmiezo a st’aria ‘mbarzamata

a guardante io nun starria!

E te dico: «Core, core!

Core mio, tornato io so.

Torna maggio e torna ammore,

fa de me quello che vuò;

torna maggio e torna ammore,

fa de me quello che vuò».