Sera d’està! Pusilleco lucente

canta canzone e addora d’erba e mare.

Voglio ‘e pparole cchiù d’ammore ardente:

voglio ‘e pparole cchiù gentile e care

pe’ ddì: «Te voglio bene» a chi me sente.

Ma d’ ‘e pparole cchiù carnale e ddoce

ne sceglio sulo tre: «Te voglio bene».

Bella, ‘int’ ‘o core tujo sacc’ io chi tiene

chi sta ‘int ‘o core mio saje pure tu.

P’ ‘o mare ‘e Napule

quant’armunia!

Saglie ‘ncielo e ‘ncielo sentono

tutt’ ‘e stelle ‘a voce mia:

voce, ca tènnera

‘st’ ammore fa.

Notte d’està! Se so’ addurmute ‘e ccase

e ‘o cielo, a mmare, nu scenario ha stiso.

Staje ‘mbracci’ a mme, nnucente so’ ‘sti vase

bella, stanotte, te so’ frato e sposo,

stanotte Ammore e Dio songh’una cosa.

Canta e d’ ‘o sonno Napule se sceta,

ridono ‘e vvocche ca se so’ vvasate,

tutt’ ‘e suspire ‘e tutt’ ‘e nnamurate

suspirano, stanotte, attuorno a tte.