Te si fatta na vesta scullata,

‘nu cappiello cu ‘e nastre e cu ‘e rrose,

stive ‘mmiezzo a tre o quatto sciantose,

e parlave francese, è accussì?

Fuje ll’autriere ca t’aggio ‘ncuntrata?

Fuje ll’autriere, a Tuleto, ‘gnorsì.

T’aggio vuluto bene a te,

tu m’ ‘e vuluto bene a me!

Mo nun ce amammo cchiù,

ma ‘e vvote tu

distrattamente pienze a me!

Reginè, quanno stive cu mmico,

nun magnave ca pane e cerase

nuje campávamo ‘e vase! E che vase,

Tu cantave e chiagnive pe’mme.

E ‘o cardillo cantava cu ‘ttico:

«Reginella ‘o vuò bene a ‘stu rre?».

T’aggio vuluto bene a te,

tu m’ ‘e vuluto bene a me!

Mo nun ce amammo cchiù,

ma ‘e vvote tu

distrattamente parle ‘e me!

Oje cardillo, a chi aspiette stasera?

Nun ‘o vvide? Aggio aperta ‘a cajola!

Reginella è vulata e tu vola!

Vola e canta, nun chiagnere ccá!

T’hê a truvá ‘na padrona sincera

ca è cchiù degna ‘e sentirte ‘e cantá.

T’aggio vuluto bene a te,

tu m’ ‘e vuluto bene a me!

Mo nun ce amammo cchiù,

ma ‘e vvote tu

distrattamente chiamme a me!