Si 'sta voce te scéta 'int' 'a nuttata,

mentre t'abbraccie 'o sposo tujo vicino.

Statte scetata, si vuò stà scetata,

ma fa' vedé ca duorme a suonno chino.

Nun ghí vicino 'e llastre pe' fa 'a spia,

pecché nun può sbaglia: 'sta voce è 'a mia.

È 'a stessa voce 'e quanno tutt'e duje,

scumuse, 'nce parlàvamo cu 'o vvuje.

Si 'sta voce te canta dint' 'o core

chello ca nun te cerco e nun te dico;

tutt' 'o turmiento 'e nu luntano ammore,

tutto ll'ammore 'e nu turmiento antico.

E si te vène smania 'e vulé bbene,

na smania 'e vase correre p' 'e vvéne,

nu fuoco che t'abbrucia comm'a che,

vasate a chiilo, che te 'mporta 'e me?

Si 'sta voce, che chiagne 'int' 'a nuttata,

te sceta 'o sposo, nun avé paura.

Vide ch'è senza nomme 'a serenata,

dille ca dorme e che se rassicura.

Dille accussi: «Chi canta 'int'a 'sta via

o sarra pazzo o more 'e gelusia!

Starra chiagnenno quacche 'nfamita,

canta isso sulo, ma che canta a fa?!».